دادگایه‌کی هۆڵه‌ندی: "Geert Wilders" بۆی هه‌یه ئیسلام به فاشی به‌راورد بکات

سه‌رکه‌وتنێکی یاسایی بۆ "Geert Wilders": دادگایه‌کی هۆڵه‌ندی له شاری "Den Haag" ڕایگه‌یاند، که فیلمی "فتنه" له به‌رهه‌مهێنانی "Geert Wilders" هانی ڕق و توندوتیژی نادات، به‌ڵکو ده‌چێته چوارچێوه‌ی سه‌ربه‌ستی ده‌ربڕینی بۆچوونه‌وه.

بڕیاری دادگا پاش به‌رزکردنه‌وه‌ی سکاڵایه‌كی یه‌کێتی ئیسلامی هۆڵه‌ندی دێت. به‌پێی سکاڵای به‌رزکراو بۆ به‌رده‌م دادگا ئه‌ندامی په‌رله‌مانی هۆڵه‌ندی ناوبراو هه‌ڵساوه به هاندانی توندوتیژ و ڕق دژی ئیسلام، ئه‌ویش پاش ئه‌وه‌ی "Geert Wilders" له فیلمه‌ی "فتنه‌"دا ئیسلامی به فاشی و  پێغه‌مبه‌ری موسوڵمانانی به دڕنده ناوبردووه. 

به‌پێی بڕیاری دادگا ئه‌ندامی ڕاستڕه‌وی په‌رله‌مانی هۆڵه‌ندی سه‌ربه‌سته له ده‌بڕینی ئه‌و شتانه‌ی به‌رامبه‌ر ئیسلام وتوێتی و کردوێتی، چونکه ئه‌وانه‌ی وتوێتی ناچنه خانه‌ی هاندانی توندوتیژ و ڕق دژی ئیسلام.

یه‌کێتی ئیسلامی هۆڵه‌ندا له‌ڕێگای سکاڵا به‌رزکراوه‌‌‌وه ویستی به‌شێوه‌یه‌کی یاسایی ڕێگا له "Geert Wilders" بگیرێت، تا چیتر له‌سه‌ر ئیسلام قسه‌ ناکات و ئیسلام له‌گه‌ڵ فاشیدا به‌راورد نه‌کات.

له بۆنه‌یه‌کی پێشووتردا "Geert Wilders" قورئانی پیرۆزی به "په‌ڕتووکێکی فاشی" ناوبردووه، هاوکات ناوبراو قورئانی له‌گه‌ڵ په‌ڕتووکی "Mein Kampf" (=تێکۆشانم) له نووسینی "ئه‌دۆلف هێتله‌ر"، سه‌رکرده‌ی نازییه‌کان، به‌راوردکردووه.

یه‌کێتی ئیسلامی هۆڵه‌ندی داوایکردبوو، که "Geert Wilders" له ڕۆژنامه سه‌ره‌کییه‌کانی هۆڵه‌ندا‌دا به‌شێوه‌یه‌کی فه‌ڕمیی داوای لێبووردن له بریندارکردنی هه‌ستی موسوڵمانه‌کان بکات.

هه‌روه‌ها یه‌کێتی ئیسلامی داوای کردبوو، که دادگا به‌یه‌کجاری ڕێگا له "Geert Wilders" بگرێت، تا چیتر له په‌یڤه‌کانیدا ناوی ئیسلام به ناشرین نه‌بات. به‌ڵام دادگا ئه‌و داواکارییه‌شی ڕه‌تکرده‌وه و پێیوایه، که "Geert Wilders" له شڕۆڤه‌کردنی په‌یڤه‌کانی سه‌ربه‌سته‌ و ناکرێت به‌ربه‌ستی بۆ دابنرێت و دانانی جۆرێك له‌سنوور ده‌چێته چوارچێوه‌ی چاودێریکردنه‌وه.

"Geert Wilders" له 2008.03.28 فیلمی "فتنه‌"ی (=بشێونه) له‌سه‌ر تۆڕی نێت بڵاوکرده‌وه، پاش ئه‌وه‌ی هه‌موو ده‌زگاکانی ڕاگه‌یاندنی هۆڵه‌ندی ئاماده‌نه‌بوون، فیلمی ناوبراو بڵاوبکه‌نه‌وه.

هه‌رچه‌نده کاردانه‌وه‌ی بۆچوون له‌ناو هۆڵه‌ندا سنوورداربوو، که‌چی ژماره‌یه‌کی زۆر له موسوڵمانه‌کانی هه‌ریه‌ك له سودان، پاكستان، يه‌مه‌ن، ماليزيا، ئيران، ئه‌ندونيسيا، ئه‌فغانستان و هتد ڕژانه سه‌ر شه‌قامه‌کان و ناڕه‌زایی خۆیان به‌رامبه‌ر ناوه‌ڕۆکی ئه‌و فیلمه ده‌ربڕی.

"Geert Wilders" له فیلمی "فتنه‌"دا وێنه‌‌کێشراوه کاریکاتۆرییه‌که‌ی کاریکاتۆریستی دانیمارکی "Kurt Westergaard" به‌کارهێنابوو، ئه‌وه‌ش له‌لایه‌ن سه‌ندیکای ڕۆژنامه‌نووسانی دانیمارکه‌وه به‌تووندی ڕه‌خنه‌ی لێگرا. چونکه ئه‌و کاره به‌پێشلکردنی مافی کۆپیکردن ناوبرا، هه‌ربۆیه سه‌ندیکای ناوبراو سکاڵایه‌کی یاسایی دژی ئه‌ندامی هۆڵه‌ندی ڕاستڕه‌و به‌رزکرده‌وه. ئێستا و بۆ ده‌ربازبوون له‌و کێشه‌یه یاساییه "Geert Wilders" هه‌ڵساوه به‌گۆڕینی ئه‌و وێنه کاریکاتۆرییه به وێنه‌یه‌کی کێشراوی دیکه‌ و ئێستاش ده‌توانرێت فیلمه "فتنه" به‌شێوازه‌ی نوێیه‌که‌ی له‌سه‌ر تۆری نێت ببینرێت

سه‌رچاوه‌ی هه‌واڵ:

Spiegel