له‌یلا زانا: به‌ڵێنم داوه‌ تا ده‌مرم خاك‌و وڵاتی‌ خۆم جێناهێڵم

16/1/2009
 
له‌یلا زانا: به‌ڵێنم داوه‌ تا ده‌مرم خاك‌و وڵاتی‌ خۆم جێناهێڵم

ژنه‌ تێكۆشه‌ری‌ ناوداری‌ كورد له‌یلا زانا، له‌لایه‌ن لقی‌ دیاربه‌كری‌ كۆمه‌ڵه‌ی‌ مافی‌ مرۆڤه‌وه‌ خه‌ڵاتی‌ ساڵی‌ 2008ی‌ پێبه‌خشرا. له‌ڕێوڕه‌سمی‌ پێشكه‌شكردنی‌ خه‌ڵاته‌كه‌دا، سه‌رۆكی‌ كۆمه‌ڵه‌كه‌ وتی‌: ئێمه‌ له‌پاداشتی‌ هه‌وڵدانی‌ زانا بۆ رێزگرتن له‌مافی‌ مرۆڤ‌و له‌به‌رئه‌وه‌ش كه‌ ئه‌و له‌1988دا یه‌كێك بووه‌ له‌دامه‌زرێنه‌رانی‌ كۆمه‌ڵه‌كه‌مان، ئه‌م خه‌ڵاته‌ی‌ پێده‌به‌خشین.
له‌ڕێوڕه‌سمه‌كه‌دا زانا سه‌باره‌ت به‌كردنه‌وه‌ی‌ كه‌ناڵی‌ TRT-6‌و شه‌ڕی‌ نێوان فه‌له‌ستین‌و ئیسرائیل‌و چه‌ند مه‌سه‌له‌یه‌كی‌ دیكه‌ دوا. ده‌رباره‌ی‌ كردنه‌وه‌ی‌ كه‌ناڵی‌ TRT-6 وتی‌: ئه‌مه‌ ته‌له‌فزیۆنی‌ كورد نیه‌، ئێمه‌ پێویستمان به‌ته‌له‌فزیۆنی‌ ئه‌وان نیه‌. خۆمان گه‌لێك كه‌ناڵ‌‌و ته‌له‌فزیۆنمان هه‌یه‌.
ده‌رباره‌ی‌ شه‌ڕی‌ ئیسرائیل‌و فه‌له‌ستینیش وتی‌: بینینی‌ دیمه‌نی‌ ئه‌و شه‌ڕه‌ خوێنی‌ مرۆڤ دێنێته‌ كوڵ‌، من بڕوای‌ ته‌واوم به‌وه‌یه‌ كه‌ هه‌م فه‌له‌ستین‌و هه‌م ئیسرائیلیش وه‌ك یه‌ك مافی‌ ژیانیان هه‌یه‌.
له‌به‌شێكی‌ دیكه‌ی‌ قسه‌كانیدا، زانا ده‌رباره‌ی‌ ئه‌و سزای‌ زیندانیكردنه‌‌ی به‌سه‌ریا دراوه‌ له‌لایه‌ن دادگای‌ توركیا دواو وتی‌: هه‌ندێك كه‌س له‌ته‌له‌فزیۆنه‌وه‌ ده‌رده‌كه‌ون‌و ده‌ڵێن به‌شكو ئه‌م سزایه‌ وایلێبكات وڵات به‌جێبهێڵێ‌‌و به‌ره‌و دۆزه‌خ ملی‌ بشكێنێت. به‌ڵام ئه‌ز به‌و داخ له‌دلانه‌ ده‌بێژم من هه‌ڵنایه‌م‌و ئێره‌ جێناهێڵم. من له‌سه‌ر عه‌رد‌و خاك‌و وڵاتی‌ خۆم ده‌مێنم، من له‌گه‌ڵ‌ خه‌ڵك‌و گه‌لی‌ خۆم ده‌بم، هه‌روه‌ك چۆن سۆزو به‌ڵێنم داوه‌ هه‌تا دوا هه‌ناسه‌ی‌ ژیانم لێره‌ ناڕۆم، هه‌تا ئه‌مرم وڵاتی‌ خۆم جێناهێڵم‌و ده‌بێت له‌م وڵاته‌دا به‌خاك بسپێردرێم».