شه‌ڕ و تێكهه‌ڵچوونی‌ ده‌ست فرۆشانی‌ شاری‌ سنه‌ له‌گه‌ڵ هێزه‌كانی‌ رژیم

وته‌ی ڕۆژ

2009-01-03

شه‌ڕ و تێكهه‌ڵچوونی‌ ده‌ست فرۆشانی‌ شاری‌ سنه‌ له‌گه‌ڵ هێزه‌كانی‌ رژیم

له‌كاتێكدا كه‌ رۆژانه‌ گوشار بۆ سه‌ر چالاكانی مه‌ده‌نی‌و سیاسی روو له‌په‌ره‌سه‌ندنه‌، هه‌واڵه‌كان باس له‌تێكه‌هه‌ڵچوونی نێوان هێزه‌ ئه‌منیه‌تییه‌كان‌و ده‌ستفرۆشانی شاری سنه‌ ده‌كه‌ن. به‌پێی‌ هه‌واڵی‌ خوێندكارانی‌ داكۆكیكار له‌ مافی‌ مرۆڤی‌ كوردستان: رۆژی‌ پێنچ شه‌ممه‌ 12ی‌ به‌فرانبار هێزه‌كانی‌ رژیم هێرشیان كردۆته‌ سه‌ر ده‌ستفرۆشانی‌ شاری‌ سنه‌و له‌ئاكامدا شه‌ڕ و تێكهه‌ڵچوون له‌ نێوان هێزه‌كانی‌ رژیم‌و ده‌ستفرۆشان هاتۆته‌ ئاراوه‌. سه‌رچاوه‌كه‌ باس له‌وه‌ ده‌كات كه‌ ماوه‌ی‌ چه‌ند رۆژێكه‌ هێزه‌كانی‌ رژیم له‌ شاری‌ سنه‌ گوشاره‌كانی‌ خۆیانیان بۆ سه‌ر ده‌ست فرۆشانی‌ شاری‌ سنه‌ په‌ره‌پێداوه‌و رێگه‌ به‌ده‌ست فرۆشانی‌ شاری‌ سنه‌ ناده‌ن كه‌ درێژه‌ به‌ كاره‌كه‌یان بده‌ن. سه‌رچاوه‌كه‌ له‌به‌شێكی‌ دیكه‌ له‌ راپۆرته‌كه‌یدا باسی‌ له‌وه‌ كردوه‌ كه‌ له‌ئاكامی‌ هێرشی‌ هێزه‌كانی‌ رژیم بۆ سه‌ر كاسبكاران، ده‌ست گیراوه‌ به‌ سه‌ر كه‌ل‌و په‌لی‌ ده‌ستفرۆشان و ئه‌مه‌ش بووه‌ به‌هۆی‌ هه‌ڵگیرسانی‌ تێكهه‌ڵچوون له‌نێوان ده‌ستفرۆشان‌و هێزه‌كانی‌ رژیم‌و چه‌ند كاسبكارێك له‌ لایه‌ن هێزه‌ سه‌ركوتگه‌ره‌كانی‌ رژیمه‌وه‌ بریندار كراون.

هێرش بۆ سه‌ر ده‌ستفرۆشانی شاری سنه‌‌و سووكایه‌تی پێكردن پێیان ره‌نگه‌ شتێكی تازه‌ نه‌بێت‌و كۆماری ئیسلامی هیچ كات نه‌بووه‌ به‌شێوه‌یه‌كی شیاو وڵامی داواكاریی‌و خواسته‌كانی چینی كه‌مداهاتی كۆمه‌ڵگا بداته‌وه‌. له‌لایه‌كی دیكه‌وه‌ ئه‌م هه‌وڵه‌ نه‌شیاوه‌ له‌كاتێكدایه‌ كه‌ ماوه‌یه‌كه‌ كۆماری ئیسلامی بۆ ئه‌وه‌ی به‌جۆرێك فه‌زایه‌كی ترساوی له‌ كوردستاندا بخولقێنێت هه‌رجاره‌و به‌بیانوویه‌ك له‌ هه‌وڵی گوشار هێنانه‌ بۆ سه‌ر كۆمه‌ڵانی خه‌ڵك. ماوه‌یه‌ك له‌وه‌ پێش بوو كه‌هێزه‌كانی رژیم له‌و په‌ڕی بێ شه‌رمیدا هێرشیان كرده‌ سه‌ر ئاوایی سه‌رسنووری شاری بانه‌و پاش تێكهه‌ڵچوون له‌گه‌ڵ دانیشتوانی ئاواییه‌كاندا ده‌ستیان گرتبوو به‌سه‌ر كه‌ل‌و په‌ل‌و له‌هه‌مانكاتدا كۆمه‌ڵێك له‌باری كاسبكارانی ئه‌و ناوچه‌یان ئاورتێبه‌ردابوو.

به‌گشتی هه‌ر له‌گه‌ڵ هاتنه‌ سه‌ركاری كۆماری ئیسلامی دام‌و ده‌زگای سه‌ركوتی رژیم له‌هیچ چه‌شنه‌ بێحورمه‌تی‌و بێ رێزییه‌ك له‌دژی كۆمه‌ڵانی خه‌ڵكی كورد به‌ چین‌و توێژه‌ جیاوازه‌كان ده‌ستیان نه‌پاراستووه‌. گوندو شارو سه‌رجه‌م چین‌و توێژه‌كانی كۆمه‌ڵگای كورد‌‌‌ به‌شێوه‌ی جیاواز كه‌وتوونه‌ته‌ به‌ر سیاسه‌تی دوژمنكارانه‌ی ئه‌م رژیمه‌. مێژووی ئه‌م سی ساڵه‌ی رژیم‌و جینایه‌تكارییه‌كانی له‌ كوردستاندا سه‌لمێنه‌ری ئه‌و په‌ڕی گوشارو پێشێلكردنی مافه‌كانی خه‌ڵكی كورده‌. هێرش بۆ سه‌ر ده‌ستفرۆشان‌و گوشار هێنان بۆ سه‌ریان به‌هه‌ر مه‌به‌ستێك بووبێت نیشانه‌ی به‌زاندنی ئه‌و په‌ڕی سنووره‌كانی به‌ها ئینسانییه‌كانه‌. بوونی توێژێكی كه‌م داهاتی كۆمه‌ڵگا كه‌ هه‌ر رۆژه‌و به‌ناچار بۆ بژیوی رۆژانه‌ی خۆیان ناچارن له‌سه‌رماو گه‌رمادا له‌سه‌ر شه‌قامه‌كاندا رابوه‌ستن‌و ته‌نانه‌ت به‌م شێوه‌یه‌ش ناتوانن داهاتی خۆیان‌و سكی منداڵه‌كانیان تێر بكه‌ن، به‌رهه‌می سیاسه‌تی دوژمنكارانه‌ی رژیمه‌ له‌ئاستی كوردستان. له‌لایه‌كی دیكه‌شه‌وه‌ ئه‌م هه‌وڵانه‌ی رژیم هه‌ندێك لایه‌نی سیاسیشی له‌پشته‌وه‌ كۆماری ئیسلامی‌و دام‌وده‌زگای سه‌ركوتگه‌ری به‌هۆی ترس له‌ ئه‌گه‌ری هه‌ر روداوێكی ئیعترازی ده‌ست له‌ هیچ تووندوتیژیه‌ك ناپارێزن.

بۆهه‌مووان روون‌و ئاشكرایه‌ كه‌ كۆماری ئیسلامی له‌كاتێكدا به‌م شێوه‌و هه‌وسار پساوانه‌ بێڕێزی به‌كۆمه‌ڵانی خه‌ڵكی كورد ده‌كات كه‌ له‌هه‌میشه‌ زیاتر توشی قه‌یران بووه‌و ئه‌مه‌ش بۆته‌ هۆی ئه‌وه‌ی كه‌ بۆمانه‌وه‌ی خۆی ێوه‌ به‌دژی دانیشتوانی كۆمه‌ڵگای ئێران‌و به‌تایبه‌تی كوردستان ره‌چاو بكات. بۆ نموونه‌و به‌گویڕه‌ی قسه‌ی به‌رپرسانی باڵای نیزامی رژیم ئه‌و په‌ڕی هه‌وڵی خۆیان بۆ كۆنترۆڵكردن‌و گوشار هێنان بۆ سه‌ر كۆمه‌ڵانی خه‌ڵك ده‌ده‌ن. ئاستی ئه‌م گوشارانه‌ له‌كوردستان به‌چه‌ند قات زیاتر به‌جۆرێك كه‌ ته‌نانه‌ت ئیعترازێكی ئاسایی ده‌ستفرۆشانی شاری سنه‌ش به‌و په‌ڕی دوژمنكاری وڵامی پێبدرێته‌وه‌. سه‌ركوت‌و كوشتن‌و ته‌قه‌كردن‌و ترس له‌ كۆبوونه‌وه‌ی ناڕه‌زایه‌تی ‌و گرتنی چالاكانی بواره‌ جیاجیاكان‌و ته‌نانه‌ت ترس له‌ كۆبوونه‌ه‌وه‌یه‌كی ئیعترازی ده‌ستفرۆشانی شاری سنه‌ نیشانه‌ی ترسی كاربه‌ده‌ستانی باڵای كۆماری ئیسلامیه‌ له‌نزیك بوونه‌وه‌ به‌داڕمان‌و له‌ده‌ستچوونی ده‌سه‌ڵاته‌ ره‌هاكه‌یان. به‌ له‌به‌رچاوگرتنی ئه‌وانه‌ی باسی هات راشكاوانه‌ ده‌توانین بڵێین یه‌كیه‌تی‌و یه‌كگرتوویی كۆمه‌ڵانی بوێری خه‌ڵكی كوردستان له‌سه‌رجه‌م ناوچه‌ جیاجیاكاندا به‌دژی ئه‌م سیاسه‌تی سه‌ركوت‌و پێشلكارییه‌ی كۆماری ئیسلامی یه‌ك له‌و مه‌رجانه‌یه‌ كه‌ شكست‌و سه‌رشۆڕی به‌م شێوه‌ سیاسه‌ته‌ به‌دژی كۆمه‌ڵانی تێكۆشه‌ری كوردستان ده‌هێنێت.