له‌سه‌ر خانه‌قین دەبێ هەمەر بەسەر لاشەی پێشمەرگە تێبپەڕێ"

"سەركردایەتیی كورد بڕیاریداوە خانەقین و ناوچەكانی دەوروبەری هێڵی سووربن بۆ كورد و بریكاری وەزارەتی پێشمەرگەش رایدەگەینێ كە ئەگەر شەڕ لە نێوان سوپا و پێشمەرگە رووبدا، دەبێ هەمەرەكانی سوپای عێراق بەسەر لاشەی پێشمەرگەدا تێبپەڕن، بەرپرسێكی سەربازیش لە هێزی پێشمەرگە ئیهانەكردنی كوردێكی ناوچەكە لە لایەن سەربازێكی عێراقی بە بڕیاری سیاسیی عێراقی نازانێ.

لە لێدوانێكیدا بۆ كوردستان راپۆرت ئەنوەری حاجی عوسمان بریكاری وەزارەتی پێشمەرگە رایگەیاند كە كاتژمێر 11ی سەر لە بەیانی رۆژی 30 /8 هێزێكی فەوجی 3ی لیوای4ی سەر بە فرقەی یەكی سوپای عێراقی ویستویەتی لە چیای ناودۆمانەوە بێنە ناو شاری خانەقینەوە و دواتر لە لایەن پێشمەرگە چەككراون و گەڕێندراونەتەوە شوێنەكانی خۆیان و گوتی” دوای ئەوەی لیژنەیەكی ئەوان بە سەرۆكایەتیی موقەدەم محەمەد هاتنە لای ئێمە و ئێمەش لە لایەن خۆمانەوە ناردمانە لای مەلا بەختیار بۆ گفتوگۆكردن لە بارەی كشانەوەی سوپای عێراقی لەو میحورە، بۆ ئەوەی چیتر گرژی و ئاڵۆزی لە نێوان سوپای عێراقی و پێشمەرگە روونەدا”.

ئەو كێشەیەی ئێستا لە خانەقین هەیە بۆ پێشتر دەگەڕێتەوە و پێویستە خانەقین و هەندێك لە ناوچەكانی هێڵی سوور بن بۆ كورد و گوتی” ئەم كێشە خەلفیەتێكی كۆنی هەیە، سەركردایەتیی سیاسیی كورد بڕیاریداوە دەبێت خانەقین و هەندێك ناوچەی چواردەوری هێڵی سوور بن، ئێمەش وەك هێزی پێشمەرگەی كوردستان دەمانەوێت شوێنە حەساسەكانی خانەقین كۆنتڕۆڵبكەین”.

بریكاری وەزارەتی پێشمەرگە لە لێدوانەكەیدا ئاماژەی بەوەش كرد كە ئێستا هیچ هێزێكی سوپای عێراقی لە ناو خانەقیندا نییە و گوتی” من ئێستا لە ناو شاری خانەقینم، هیچ هێزێكی سوپای عیراقی لێ نییە و پانزە كیلۆمەتر چواردەوری خانەقین بەدەست هێزی پێشمەرگەی كوردستانەوەیە، واتە رێگەی خانەقین – بەغدا”.

ئەنوەری حاجی عوسمان ئاماژەی بەوەش دا كە لە سەر فەرمانی سەركردایەتیی سیاسیی كورد دەبێت ناو شاری خانەقین و چواردەوری خانەقین، هێزی پێشمەرگەی لێبێت و نابێت سوپای عیراقی لێبێت بە هەرجۆرێك بێت. هەروەك ئەوەشی رەتكردەوە كە هیچ گرژییەك لە نێوان سوپای عێراقی و هێزی پێشمەرگە هەبێ و گوتی” ئەمڕۆ ئێمە هەست بە ئارامییەك دەكەین لە نێوان ئێمە و ئەوان دا، ئەو گرژییە نەماوە لە نێوانماندا، ئەگەر هەر گرژییەكیش روویدا، دەبێت سەركردایەتیی سیاسیی كورد لە هەولێر و بەغدا چارەسەری بكات، نەك پێشمەرگە”.

بریكاری وەزارەتی پێشمەرگە ئەوەشی راگەیاند كە ئەگەر سەركردایەتیی كورد فەرمانیان پێبدا ئەوا قەرەتەپەش دەگرنەوە و گوتی” ئەگەر شەڕ لە نێوان سوپای عێراقی و هێزی پێشمەرگە روویدا، دەبێت ئۆتۆمبێڵە هامەرەكان بە سەر لاشەی ئێمەدا تێپەڕبن، ئەگەر سەركردایەتیی سیاسیی كورد بڕیاربدات، قەرەتەپە دەگرینەوە، بەڵام تاوەكو ئێستا هیچ بڕیارێك لەم بارەوە نییە”.

لە لایەكی دیكەوە مەحمود سەنگاوی ئەندامی سەركردایەتی یەكێتیی نیشتمانی و نوێنەری جەلال تاڵەبانی لە هێزی پێشمەرگەی كوردستان كە لە شاری خانەقینە بە كوردستان راپۆرتی راگەیاند كە خانەقین ئارامە و هیچ گرژی و ئاڵۆزییەك نییە لە نێوان پێشمەرگە و سوپای عێراقی و گوتی” هیچ مەترسییەك نییە تا ئێمە رووبەڕووی ببینەوە”.سەنگاوی ئاماژەی بەپەیوەندییە تەلەفۆنییەكەی نێوان سەرۆكی هەرێم و سەرۆك وەزیرانی عێراقی دا سەبارەت بە هاتنی سوپا بۆ ناو خانەقین و ناوچەكانی دەوروبەری و گوتیشی كە وەفدێك بۆ ئەم مەبەستە چۆتە بەغدا بۆ ئەوەی لەگەڵ حكومەتی عێراق گفتوگۆ بكەن بۆ كۆتاییهێنان بەم كێشانە.

لە لێدوانەكەیدا بۆ كوردستان راپۆرت سەنگاوی جەختی لە سەر ئەوە كردەوە كە سوپای عێراقی لە خانەقیندا نییە و ئەو هێزانەش كە لە ناو شاری خانەقیندان چاوەڕوانی بڕیاری سیاسیی كوردن و گوتی” ئەگەر ئەوان بڵێن بكشێنەوە یان بمێننەوە ئێمە وەك هێزی پیشمەرگەی كوردستان بەس بڕیاری سیاسیی سەركردایەتیی كورد جێبەجێدەكەین”.

سەبارەت بە كۆنتڕۆڵكردنی قەرەتەپەش لە لایەن سوپای عێراقییەوە و هەراسانبوونی كوردەكانی ئەو ناوچەیە بەو هۆیەوە، سەنگاوی گوتی” خەڵكی ئێمە لە بەر ئەوەی فێری ئازادییەكی رەهابوونە، ئەگەر لە لایەن جوندییەكەوە قسەی پێ بگوترێ، ئەو بە ئیهانەی لە قەڵەمدەدات، یان بە غەدری دەزانێت، ئەو ئیهانەیەی كە لە لایەن چەند جوندییەكەوە بە كوردەكان كراوە پەیوەندی بە بڕیاری سیاسیی عێراقەوە نییە”. سەنگاوی گوتیشی” ئێمە بە پێی دەستوور چەسپاندوومانە كە ئەو ناوچانە سەر بە هەرێمی كوردستانن، بەڵام ئەگەر حكومەتی عێراقی بیەوێت غەدرمان لێبكات، ئەو كات ئێمەش بڕیارێكی لێدەدەین”.