چه‌ند قسه‌یه‌کی کورت له‌ گه‌ل که‌یوان سه‌نائی

له‌ چه‌ند حه‌وتوی رابردودا سکالانامه‌یه‌کت له‌ دژی کۆمه‌ڵه‌ و کاک عه‌بدوللاَی موهته‌دی له‌ چه‌ند سایتێکی‌ ئینتيرنێتیدا بلاو کردوه‌ته‌وه ، ته‌نانه‌ت به‌مه‌شه‌وه‌ رانه‌وه‌ستاوی وله‌ دادگای سلێمانیش شکاتت له‌ کۆمه‌ڵه‌ کردوه‌ له‌ سه‌ر هێندێک پاره‌ که‌ کۆمه‌ڵه‌ به‌ تۆ قه‌رزداره‌.
پێش هه‌مو شتێک ده‌بی ئه‌مه‌ بلێم که‌ زۆر به‌داخه‌وه‌م که‌ ئه‌م کێشه‌ گه‌یشته‌ ئه‌م ئاسته‌ که‌ تو ئه‌م کارانه‌ بکه‌یت. به‌لام مه‌به‌ست له‌م نامه‌ هێندێک روونکردنه‌وه‌یه‌ که‌ پێم باش بو وه‌بیرخۆتی بهینمه‌وه‌.
یه‌که‌م، تو له‌ ولاتێکی ئوروپائی ده‌ژیت و هیچ نه‌بێت له‌ هێندێک یاسای ئه‌م ولاته‌ به‌تایبه‌تی یاسای ئه‌حوالی شه‌خسی ده‌بی تێگه‌یشتبێتیت به‌تایبه‌تی خۆت ئاماژه‌ت به‌وه‌ کردوه‌ که‌ له‌ هوله‌ند له‌ زانستگاش ده‌رست خۆیندوه‌، به‌لام له‌و سکالانامه‌یه‌ت دا رێک به پێچه‌وانه‌ی یاساکانی مافی تاکه‌که‌س عه‌مه‌لت کردوه‌، بو نمونه‌ تو بۆت نیه‌ موکالمه‌ی ته‌له‌فونی که‌سێک به‌ بێ ئاگاداری خۆی ریکۆرد بکه‌یت و له‌ میدیا بلاوی بکه‌یته‌وه‌، هیچ ده‌زانی ئه‌م کاره‌ت به‌ته‌واوی به‌ پێچه‌وانه‌ی یاسایه‌ و ته‌نانه‌ت له‌دادگاش رێگات پێ ناده‌ن له‌ دژی به‌ناو تاوانبار به‌کاری بێنیت.
دوهه‌م، تو له‌م مه‌سه‌له‌ی پاره‌ ته‌بلیغاتێکی ژاراویت بو شکاندنی که‌سایه‌تی تاک له‌ کۆمه‌ڵگا وه‌رێخستوه‌، له‌هه‌مان کاتدا که‌یسی سیاسیت لێ دروست کردوه‌ که‌ ناره‌وا و ناراست و نابه‌جێگه‌ن، به‌م شێوه کێشه‌که‌ت له‌ که‌یسێکی حقوقی ده‌رهێناوه‌ و کردوته‌ به‌ که‌یسێکی سیاسی که‌وابو شێوه‌ی هه‌ل سوکه‌وت له‌ گه‌ل که‌یسی له‌م چه‌شنه‌ جیاواز ده‌بێت . بو سه‌لماندنی ئه‌م راستیه‌ ته‌نها به‌ چاوخشاندنێک به‌ سه‌ر تۆری ئینترنێت دا و خوێندنه‌وه‌ی نوسراوه‌کانی خۆت ئه‌م حه‌قیقه‌ته‌ ده‌سه‌لمێنرێت . ‌
هه‌م خۆت و هه‌م ئه‌وکه‌سانه‌ی که‌ سکالانامه‌که‌ی تۆیان خۆیندوه‌ته‌وه‌ ده‌زانن که‌ کۆمه‌ڵه‌ له‌ هیچ جێگایه‌ک نکۆلی له‌و پاره‌ی تۆ نه‌کردوه‌ و هه‌ر وه‌ک هاوری عه‌بدوللای موهته‌دی به‌ شاهیدی کاک نه‌جمه‌دینی گولپه‌روه‌ ئه‌ندامی کومیسیونی مالی کۆمه‌ڵه‌ له‌ نامه‌که‌یدا که‌ بۆتی ئیمزا کردوه‌ و هه‌روه‌ها کاک جه‌عفه‌ری ئیلخانیزاده‌ و کاک نه‌جمه‌ش له‌ موکالمه‌ ریکوردکراوه‌کانیاندا ئاماژه‌یان به‌وه‌ کردوه‌ که‌ ئیمه‌ ئه‌م پاره‌ به‌تو قه‌رزدارین و ده‌ت ده‌ینه‌وه‌، به‌لام ئیستاکه‌ ناتوانین هه‌ر هه‌موی به‌یه‌کجار بده‌ینه‌وه‌، و هیچ کام له‌م به‌ریزانه‌ نکۆلیان له‌ پاره‌که‌ی تۆ نه‌کردوه‌ سه‌ره‌رای ئه‌وه‌ی که‌ به‌ده‌یان و سه‌دان جار ته‌له‌فونت بو کردون و به‌ده‌یان جار قسه‌ی ناشیرینت پێ وتون، به‌لام ئیستاش ده‌لیين که‌ ئه‌و پاره‌ ده‌ده‌ینه‌وه‌. تو به‌ هیچ شێوه‌یه‌ک حازر نه‌بویت له‌گه‌ل هاوریانی کۆمه‌ڵه‌ رێک بکه‌ویت که‌ له‌ دانیشتنی ئاخردا له‌ سلیمانیش پیشنیاریان پێت کرد، به‌لام ئه‌مه‌شت قه‌بول نه‌کرد و ئیستاکه‌ که‌یسی سیاسیشت لێ سازکردوه‌ و کۆمه‌لێک هاته‌ران پاته‌رانت پێکه‌وه‌ناوه‌ و بڵاوت کردوه‌ته‌وه‌ و خۆیشت وا مه‌زلوم نیشان داوه‌ که‌ خه‌لکی ساده‌ به‌زه‌ییان پێتدابێت و که‌سێک نابه‌له‌د بێت پێيوایه‌ به‌راستی حوسه‌ینی که‌ربه‌لا ئه‌تۆی!
کاک که‌یوان! تو پاره‌که‌ت بردبوو بو کوردستان که‌ بیزنیسی پێوه‌ بکه‌یت (که‌ حه‌قی خۆته) به‌لام هه‌روه‌ک خۆیشت ئاماژه‌ت پێداوه‌ به‌ هۆگه‌لیک بۆت نه‌کراوه‌ و رێکی نه‌هاتوه، بۆیه‌ ئه‌وپاره‌یه‌ت به‌کۆمه‌ڵه‌ داوه‌ نه‌ک له‌به‌ر خێرخوازی خۆت و ته‌نانه‌ت وه‌ک ئه‌مانه‌ت، به‌لکوو رێک بو کاری بیزنیس و سوود وه‌رگرتن (که‌ ئه‌ویش چ سودێک له‌ یه‌ک سالدا ده‌هه‌زار يؤرؤ! هیچ بانکیکی دونیاش ئه‌وه‌نده‌ت پێنادات)، بۆیه‌ تو حازربویت ئه‌م کاره‌بکه‌یت. ئه‌لحه‌ق کۆمه‌ڵه‌ش له‌ ناچاری و به‌هۆی ده‌ست ته‌نگی ئه‌م کاره‌ی کردوه‌ و خۆی خستوه‌ته‌ ژێر ئه‌م قه‌رزه‌ و نیه‌تیشی هه‌رئه‌مه‌ بوگه‌ که‌ له‌کاتی خۆیدا بتداته‌وه‌، به‌لام هه‌روه‌ک ده‌یان و  سه‌دان پرۆژه‌ی دیکه‌ که‌ ره‌نگه‌ سه‌ر نه‌گرێت و زه‌ره‌ری تێدا بکه‌یت ئه‌م پرۆژه‌ی تویش به‌هۆی نه‌داری کۆمه‌ڵه‌وه‌ سه‌ری نه‌گرت به‌لام کۆمه‌ڵه‌ به‌هۆی ته‌عه‌هودێکی ئه‌خلاقی که‌ به‌ توی دابو قه‌د حازر نه‌بو نکۆلی له‌وپاره‌ بکات، به‌لام به‌ ئیستاشه‌وه‌ هه‌ر حازره‌ پاره‌که‌ت بداته‌وه ، ته‌نها له‌سه‌ر چه‌ند و چۆنیه‌تیه‌که‌ی قسه‌ی هه‌بوه‌.
پێم خۆشه‌ ئاماژه‌ به‌وه‌ش بکه‌م که‌ئایا به‌راستی پێت وایه‌ وه‌دوا که‌وتنی ئه‌و پاره‌یه‌ت بو چه‌ند ماوه‌يه‌ک ئه‌رزشی ئه‌مه‌ی بو که‌ ئه‌م کاره‌ ناحه‌زانه‌ بکه‌یت؟ یان که‌سانێک له‌ژێر ناوی دلسۆزی بو تو له‌ ساویلکه‌ئی تو که‌ڵکیان وه‌رگرت تا به‌خه‌یالی خۆیان که‌یسێکی سیاسی دژی کۆمه‌ڵه‌و سکریتێره‌که‌ی دروست بکه‌ن؟ هه‌ر ئه‌وکه‌سانه‌ی که‌ به‌تو به‌لێنیان دابوو که‌ حازرن هاوکاریت بکه‌ن بو وه‌رگرتنه‌وه‌ی پاره‌که‌ت و دوایه‌ش ناو و نیشانی مال و ژماره‌ی ته‌له‌فون و ناوی پاسپۆرتی هاوریيانێک له‌ سه‌رکردایه‌تی کۆمه‌له‌یان به‌ تۆ داو داوایان لێت کردبو که‌ ئه‌مانه‌ به‌ پۆلیسی ئه‌و ولاتانه‌ بده‌یت. ئه‌م که‌سانه‌ بیریان له‌مه‌ نه‌کردبوه‌وه‌ رۆژێک ناویان لای خه‌لک ده‌زرێت و وه‌ک کارێکی جاسووسى له‌لایه‌ن کۆمه‌لانی خه‌لکی ئازادیخوازه‌وه‌ تف و نفرینیان بۆ ده‌نێرن، ده‌نا ئه‌گه‌ر کۆمه‌ڵه‌ پاره‌ به‌تو قه‌رزداره‌ بۆ ژن و مندالی فلانه‌ هاوڕی سه‌رکردایه‌تی کۆمه‌ڵه‌ چ گوناهێکی بو که‌ تو‌ كاتى سه‌ر له به‌يانى هه‌موو رۆژێکدا زه‌نگ بو ته‌له‌فونی ماله‌که‌یان ده‌ده‌یت و تێر قسه‌ى نه‌شياو ده‌كه‌يت. هه‌م ئه‌م کاره‌ی تو قه‌بێحه‌ و هه‌م ئه‌و که‌سه‌ی وا زانیاریه‌کانی به‌ تۆ داوه‌ و ده‌بێت ریسوا بکرێن.
هیچ ده‌زانی که‌ به‌ده‌یان و سه‌دان که‌س هاتنه‌ ناو ریزه‌کانی ئه‌م حیزبه‌وه‌ و ته‌نیا سه‌رمایه‌ی ژیانیان که‌ گیانیان بێت له‌ پێناو ئامانجه‌به‌رزه‌کانیاندا به‌خت کرد، هیچ ده‌زانی زۆر که‌س، کچ، کوڕ، خۆشک و براو و باب و که‌س و کاریان له‌م حیزبه‌دا گیانیان له‌ده‌ست داوه‌، پێت شه‌رم نیه‌ بو هێندێک پاره‌ ئاوا بکه‌یت؟ پاره‌یه‌ک که‌ به‌قه‌رز داوته‌ ئه‌وانیش وتویانه‌ ده‌ت ده‌ینه‌وه! به‌راستی جێگای شه‌رمه‌زاریه‌ بو که‌سێک که‌ کاتێک له‌ کۆمه‌ڵه‌دا بووبیت. تؤ كاتى خؤى به‌هاوریانت ده‌گوت بانگم بکه‌ن "شه‌هید که‌یوان! له‌ بێرته‌؟
به‌لام کاک که‌یوان ئیستاکه‌ش که‌ کاره‌که‌ت گه‌یاندوه‌ته‌ ئه‌م ئاسته، کۆمه‌ڵه‌ش رێز و حورمه‌تی  بو بریاری ئه‌و دادگایه‌ داده‌نێت که‌ تو شکاتت لای کردوه‌ و هه‌ر بریارێک بدات سه‌دا سه‌ت به‌رێوه‌ی‌ ده‌بات و روره‌شی بو ئه‌و که‌سانه ‌ده‌مێنێته‌وه‌ که‌ پێان وابو به‌ بردنه‌ دادگای کۆمه‌ڵه‌ و سکرتیره‌که‌ی حه‌قانیه‌تێک بۆ خۆیان دروست بکه‌ن، به‌لام به‌ پێچه‌وانه‌ ،کۆمه‌ڵه‌ به‌م کاره‌ نه‌ته‌نیا سووک نابێت به‌لکو با هه‌مو دونیا بزانێت، با کۆمه‌لانی خه‌ڵکی کوردستان بزانن که‌ رۆله‌کانیان و حیزبه‌که‌یان به‌ چ شێوه‌که‌ک و له‌چ شه‌رایه‌تێکدا حازرن به‌خه‌باتی خۆیان درێژه‌بده‌ن و به‌ چ ده‌ست ته‌نگیه‌ک به‌و هه‌مو کارانه‌یاندا، له‌ ئوردوگای پێشمه‌رگه‌کانه‌وه‌ بگره‌ تا بنه‌ماله‌ ئاواره‌کانی کوردی رۆژهه‌لاتی ژێر چاوه‌دێری کۆمه‌له‌ و کاری راگه‌یاندن و ده‌یان کارو ئه‌رکی دیکه‌ که‌ له‌سه‌ر شانیه‌ته‌ی ئه‌رکه‌کانی راده‌په‌رێنێت، له‌هه‌مان کاتدا با ئه‌وه‌ش بزانن که‌ کۆمه‌ڵه‌ سه‌د ئه‌وه‌نده‌ش له‌ ته‌نگانه‌ی مالیدا بێت قه‌ت حازر نیه‌ و نه‌بوه‌ که رێگا به‌‌ که‌سانێک له‌ناو ریزه‌کانیدا بدات له‌رێگای نامه‌شروع پاره‌ كۆبکه‌نه‌وه و ئاکامه‌که‌یشت له‌ مانگه‌کانی رابردوادا دیت. با له‌ ته‌نگانه‌ی مالیشدابین به‌لام سه‌رمان هه‌ر  به‌رز راده‌گرین و ده‌ست له‌خه‌بات تێکۆشان هه‌ل ناگرین.
حه‌میدی به‌هرامی
20ی مه‌ی 2008